Search
  • HÆGLÆTI

Þegar ég virkilega fór að sjá, heyra og finna!

Updated: Apr 8, 2021


Ég hef reynt að halda mörgum boltum á lofti. Það hefur tekist og ég

hef klúðrað því. Þegar ég fór út í lífið vildi ég vera dugleg og

samviskusöm. Ég var svo samviskusöm að það fór snemma að valda mér

streitu og kvíða. Ég var konan sem var með allt á hreinu, með

fullkomnunaráráttu í farteskinu og reyndi mitt allra besta að halda

sem flestum boltum á lofti. Ég var svokölluð ofurkona og ofurmamma!

Líf mitt einkenndist oft af miklum hraða, klára þetta, gera hitt og

ljúka þessu. Þegar ég hafði svo lokið þessu þurfti ég að drífa mig í

að klára það næsta.


Það er líklegt að einhverjir tengi við þessi skrif og það að vera

fastur í neti samfélags og umhverfis, sem á það svo sannarlega til að

gera of miklar kröfur á okkur. Við höfum mörg upplifað það að vera

föst í hamsturshjóli og þurft að hlaupa sífellt hraðar og hraðar.

Mögulega erum við líka með koll sem segir okkur að gera betur og betur

og setur á okkur óraunhæfar kröfur. En þarf þetta endilega að vera

svona?


Svar mitt við þeirri spurningu er nei. Við getum stokkið út úr

hamsturshjólinu og sagt skilið við það. Við getum ráðið hraðanum í

okkar lífi og ráðið ferðalagi okkar sjálf. Ég hef gert það. Ég komst

ekki á þann stað á einni nóttu. Það var langt, strangt en sannarlega

magnað ferðalag. Fyrir meira en áratug áttaði ég mig á því að ég vildi

vinna í sjálfri mér og þroskast. Ég fór að æfa mig í að setja mörk og

fara eftir mínum vilja frekar en annarra. Á leiðinni valdi ég mér

ákveðin gildi sem ég hef reynt að fylgja. Á ferðalaginu fann ég

jafnframt að mikill hraði hentar mér ekki og leggst hreinlega illa í

mig. Ég æfði mig í að fylgja hjartanu mínu og standa með mér í erfiðum

aðstæðum. Ég lærði að hlusta á mikilvægar raddir líkamans og

sálarinnar. Enginn verður óbarinn biskup og þessi ferð gekk ekki

áfallalaust fyrir sig. En hún var sannarlega þess virði. Ég lærði að

stjórna ferðinni sjálf og velja það líf sem ég virkilega vil fyrir mig

sjálfa.


Þegar ég segi stjórna ferðinni sjálf þá á ég við að ég er

skipstjórinn í mínu lífi en ekki gömul mynstur, norm eða aðrir. Lífið

varð á einhvern undursamlegan hátt dýpra og litríkara eftir að ég

hægði á ferðinni. Ég fór að taka betur eftir, því það er nefnilega

þannig að þegar maður hægir á, þá fer minna framhjá manni. Ég fór að

stunda núvitund af kappi, þefa af blómum, faðma tré, vaða í köldum

lækjum og finna ferskan andblæinn strjúka kinnar. Ég lagði mig fram og

hlustaði betur á börnin mín og virkilega var á staðnum með þeim. Ég

lærði að forgangsraða og einbeita mér að því sem virkilega skiptir

máli. Sumt má sannarlega bíða og sumt er mikilvægara en annað. Ég

gerði útiveru að stórum þætti í lífi mínu og tengdi mig betur

náttúrunni. Ég áttaði mig á því að lífið er ekki sjálfsagt og hver

dagur er í raun mjög einstakur. Hvert augnablik er gjöf og fyrir það

ber að þakka. Ég fór að gefa litlu hlutunum í kringum mig sérstakan

gaum og sjá hvað veröldin er uppfull af litlum og stórum kraftaverkum.

Ég lagði mig fram um að vera meðvituð. Meðvituð um að það skapar

enginn minn veruleika nema ég sjálf og ef leiðin er grýtt þarf ég að

skoða mig sjálfa og mínar hindranir. Ég æfði mig í samkennd og að taka

sjálfri mér eins og ég er með öllum mínum kostum og brestum.



Ég er langt því frá fullkomin í mínu hæglæti. Ég berst enn við gömul

mynstur og raddir sem segja mér að flýta mér. En ég hef valið að vera

meðvituð. Meðvituð um að ég hef val hvernig ég bregst við. Það er

nefnilega það sem hæglæti snýst um. Að hafa þetta meðvitaða val í

lífinu. Val til þess að vera skipstjórinn, val til þess að taka

ákvarðanir, val til þess að velja aðstæður, val á samskiptum og val

til þess að taka ábyrgð á eigin líðan og heilsu. Hæglæti hefur

sannarlega verið mitt svar við hraða og streitu samfélagsins og

mótsvar gegn vanlíðan, kvíða, stressi og hraða í eigin lífi. Ég er

sannarlega þakklát að hafa gírað mig niður og stigið á bremsuna.


Það geta allir tileinkað sér hæglæti og það má útfæra það á ýmsa vegu.

Það er enginn ein rétt leið til hægara lífs og við erum sannarlega

ekki í samkeppni hvort við annað. Hver og einn þarf að velja sína leið

við ósinn og munið að hamingjan er ferðalag en ekki áfangastaður!


Sólveig María Svavarsdóttir

varaformaður Hæglætishreyfingarinnar á Íslandi


Meira um Sólveigu Maríu hér:

https://www.haeglaeti.is/copy-of-%C3%BE%C3%B3ra-j%C3%B3nsd%C3%B3ttir-1


Og Sólveig María er með samfélagsmiðlana:

https://www.facebook.com/solveig.svavarsdottir.1

https://www.instagram.com/utiveraogbornin/

400 views0 comments

Recent Posts

See All