top of page

Ingibjörg Ólafsdóttir
Ritari hæglætishreyfingarinnar á Íslandi

336962177_520566273578980_3675672030782906299_n.jpg

Ingibjörg heiti ég og hef búið í Svíþjóð frá árinu 2008 en er annars frá Reykjavík. 

​

Ég kynntist hæglætishugmyndafræðinni í kjölfar reynslu minnar og bataferlis í gegnum streitutengda kulnun/örmögnun fyrir nokkrum árum síðan og ég hef haldið úti reikningnum Streita-Kulnun-Hvíld á Instagram og Facebook frá árinu 2019. ​Samfélagsmiðlarnir mínir eru vettvangur fyrir eigin hugleiðingar og fræðslu um streitu, kulnun, burnout og bata frá ýmsum áttum.

 

Ég brenn fyrir því að auka þekkingu, skilning og stuðning við fólk sem þjáist af streitu og kulnun, því algenga og alvarlega heilsufarsvandamáli sem það er, og auka þekkingu út í samfélagið svo við getum betur fyrirbyggt og gripið inn í áður en skaðinn er skeður, sem og stutt við þá sem eru í sínu bataferli. 

Ég vinn núna sem fulltrúi hjá Menntasjóðinum sænska, CSN, en er með menntun og reynslu í ýmsu og allskonar. T.d. háskólamenntun í gæðastjórnun, mannfræði, fjölmiðlun og nú síðast kláraði ég nám í slökunar- og streituráðgjöf frá Svíþjóð. Ég hef unnið við t.d. málefni hælisleitenda í Svíþjóð, foreldrastarf og skiptinemastarf á Íslandi. 

96354198_10158002055449303_1751832351614

Ég er mikill lestrarhestur og hef líka gaman að því að prjóna, fyrir utan það að halda úti miðlunum mínum sem er mitt helsta áhugamál. Ég á einnig stóra alþjóðlega fjölskyldu, hund og skjaldbökur. Gönguferðir, útivera og garðyrkjustörf fylla líka á batteríið.  

Hæglætis áherslur mínar eru sjálfbær og heilbrigður taktur milli virkni og hvíldar, mikilvægi reglubundinnar hvíldar í hinu dags daglega, mikilvægi þess að minnka hraða og draga úr óþarfa spennu í hinu daglega lífi, streitustjórnun, forvarnir gegn streitu og kulnun, núvitund.  

Ég held úti Instagram og Facebook reikningunum Streita-kulnun-hvíld og mig er að finna undir Ingibjörg Ólafsdóttir á Facebook.

​

​

​

Hvað er hæglæti?

HÆGLÆTI SVAR VIÐ HRAÐA OG STREITU SAMFÉLAGSINS

​

Hæglætishreyfingin er hreyfing fólks sem hefur tileinkað sér eða hefur áhuga á að tileinka sér hæglæti (e. slow living, einnig simple-living). Hæglæti er svar við hraða og streitu samfélagsins. Hæglæti er val um að lifa meðvitað og að hafa stjórn á og val um það hvernig maður ver tíma sínum. Hæglæti getur veitt okkur aðgang að því að verða meðvituð um að maður hefur alltaf val um ákvarðanir og aðstæður og þar með að upplifa sig ábyrgan fyrir eigin líðan, heilsu og samskiptum sínum við aðra.

 

ÁVINNINGUR HÆGLÆTISLÍFSSTÍLS

​

Hæglæti getur haft það í för með sér að auðveldara verður að dvelja í núvitund, að vera vakandi og með athygli á núlíðandi stund. Að heyra og hlusta, að anda og njóta, að velja meðvitað að takmarka streitu, draga úr neyslu, taka sér minna fyrir hendur og gera færri hluti í einu. Að beina athyglinni frekar að því að vera í stað þess að vera upptekinn af því að gera æðislega mikið. Fara hægar yfir, þá aðallega huglægt, einfalda lífið og draga úr kröfum. Hæglæti er þó ekki það sama og að gera allt löturhægt. Hæglætishugsun getur einmitt hjálpað okkur að fara hratt yfir, þó við gerum bara eitt í einu.

​

Hæglætishreyfingin á rætur sínar að rekja til Hæglætisfæðuhreyfingarinnar (e. Slow-food movement) sem varð til á Ítalíu á níunda áratug liðinnar aldar. Sagan segir að upphafsmaður hreyfingarinnar, Carlo Petrini, hafi í einskonar mótmælaaðgerð gegn skyndibitastöðum á borð við MacDonalds, hafið baráttu við að vernda ítalskar matarhefðir og menningu sem fólu það í sér að taka sér góðan tíma til matargerðar og neyslu matar, að notast við hráefni sem væri ræktað sem mest í nálægð við neytandann og að matur væri útbúinn frá grunni. Aðalhvatningin var að njóta þess að matbúa og borða í hæglæti. Í dag hefur hæglætisfæðuhreyfingin breiðst út um allan heim og nýtur verðskuldaðrar hylli.

bottom of page