top of page

Hvernig stuðlum við að hæglæti?

Tilgangur okkar og markmið er að tala fyrir og fjalla um hæglæti sem er raunverulega forvörn gegn hraða, streitu, áreiti og örmögnun.  Hæglæti er líf í meðvitund.

 

HÆGLÆTISHLAÐVARP

​

Í hverjum mánuði setjum við í loftið nýjan hæglætisþátt. Hver þáttur er tileinkaður sérstöku umræðuefni sem gefur hlustanda góða innsýn inn í efnið á stuttum tíma. Fyrsti þátturinn fjallar almennt um hvað hæglæti er, en síðar förum við til dæmis ítarlega í það hvernig hæglæti birtist og nýtist okkur í samskiptum, samböndum, uppeldi, á heimilinu, í starfi, á ferðalögum, í mat, drykk, áhugamálum og öðru. 

​

HÆGLÆTISBLOGG

​

Við birtum reglulega fróðlega pistla sem tengjast umræðuefni mánaðarins og því sem stendur okkur nærri hverja stund. Pistlarnir munu birtast á heimasíðunni okkar og á samfélagsmiðlunum okkar: HÆGLÆTI á Facebook og Instagram.

​

HÆGLÆTISHREYFINGIN

​

Við hvetjum alla áhugasama um að taka þátt í hæglætinu með því að ganga til liðs við hópinn okkar HÆGLÆTISHREYFINGIN á facebook. Þar er öllum velkomið að varpa fram spurningum, deila reynslu sinni, áhugaverðu efni og öðru.

Hvað er hæglæti?

HÆGLÆTI SVAR VIÐ HRAÐA OG STREITU SAMFÉLAGSINS

​

Hæglætishreyfingin er hreyfing fólks sem hefur tileinkað sér eða hefur áhuga á að tileinka sér hæglæti (e. slow living, einnig simple-living). Hæglæti er svar við hraða og streitu samfélagsins. Hæglæti er val um að lifa meðvitað og að hafa stjórn á og val um það hvernig maður ver tíma sínum. Hæglæti getur veitt okkur aðgang að því að verða meðvituð um að maður hefur alltaf val um ákvarðanir og aðstæður og þar með að upplifa sig ábyrgan fyrir eigin líðan, heilsu og samskiptum sínum við aðra.

 

ÁVINNINGUR HÆGLÆTISLÍFSSTÍLS

​

Hæglæti getur haft það í för með sér að auðveldara verður að dvelja í núvitund, að vera vakandi og með athygli á núlíðandi stund. Að heyra og hlusta, að anda og njóta, að velja meðvitað að takmarka streitu, draga úr neyslu, taka sér minna fyrir hendur og gera færri hluti í einu. Að beina athyglinni frekar að því að vera í stað þess að vera upptekinn af því að gera æðislega mikið. Fara hægar yfir, þá aðallega huglægt, einfalda lífið og draga úr kröfum. Hæglæti er þó ekki það sama og að gera allt löturhægt. Hæglætishugsun getur einmitt hjálpað okkur að fara hratt yfir, þó við gerum bara eitt í einu.

​

Hæglætishreyfingin á rætur sínar að rekja til Hæglætisfæðuhreyfingarinnar (e. Slow-food movement) sem varð til á Ítalíu á níunda áratug liðinnar aldar. Sagan segir að upphafsmaður hreyfingarinnar, Carlo Petrini, hafi í einskonar mótmælaaðgerð gegn skyndibitastöðum á borð við MacDonalds, hafið baráttu við að vernda ítalskar matarhefðir og menningu sem fólu það í sér að taka sér góðan tíma til matargerðar og neyslu matar, að notast við hráefni sem væri ræktað sem mest í nálægð við neytandann og að matur væri útbúinn frá grunni. Aðalhvatningin var að njóta þess að matbúa og borða í hæglæti. Í dag hefur hæglætisfæðuhreyfingin breiðst út um allan heim og nýtur verðskuldaðrar hylli.

bottom of page